ნაკრძალში იმერულ მუხას აღადგენენ

დასავლეთ საქართველოში მდებარე აჯამეთის ნაკრძალში წითელ ნუსხაში შეტანილი იმერული მუხის აღდგენის პროექტი დაიწყო. 1,4 ჰექტარის ფართობზე უკვე დაირგო 5 ათასი ნერგი, მოეწყო წვეთოვანი სარწყავი სისტემა და დაყენდა 20-ტონიანი წყლის რეზერვუარი. მომდევნო ეტაპზე დაირგვება 6,5 ათასამდე ნერგი და დაყენდება 200-ტონიანი წყლის რეზერვუარი.

საერთო ჯამში, ქართული მუხის აღდგენის ფარგლებში სამი წლის განმავლობაში იგეგმება 25 ათასამდე ნერგის დარგვა და მცირე სანერგის შექმნა. აჯამეთის ნაკრძალი მდებარეობს ბაღდათისა და ზესტაფონის მუნიციპალიტეტებში, ქუთაისიდან 15 კმ-ში. მასშია საქართველოში ერთ-ერთ უდიდესი მუხის ტყე, რომლის ფართობი, დაახლოებით, 5 ათასი ჰექტარია.